|
Hamrun Spartans FC Youth Nursery
Dan l-istaġun, il-Ħamrun Spartans FC Youth Nursery
dieħla fil-21 sena mit-twaqqif tagħha. Kien il-mibki Tony
Bajada, li, flimkien u bl-għajnuna ta' Noel Attard u Charles
Xuereb, f'Diċembru ta' l-1987 ġietu l-idea li jifforma
Nursery tal-football fil-Ħamrun, bil-ħsieb li jipprepara u
jtella' players għat-Team tal-Kbar li f'dik l-epoka kien
għaddej fl-aqwa tiegħu.
Minn numru ta' xi madwar 40 player li n-Nursery bdiet biħ 20
sena ilu, illum jattendu xejn inqas minn 260 tifel u tifla
bejn l-eta ta' 5 u 19 –il sena. Minn fost il-players li
għaddew min-Nursery, kienu bosta li għamlu l-grad, kemm ma
l-Ispartans kif ukoll ma' clubs oħra madwar Malta u man-Nazzjonal.
Matul iż-żmien, in-Nursery għaddiet minn diversi problemi
f'dawk li huma grounds għat-taħriġ, saħansitra, għal żmien
mhux ħażin, kienu ristretti li jittrenjaw fuq it-tarmak
tal-Liċeo tal-Ħamrun. Dawn id-diffikultajiet qatt ma qatgħu
qalb Tony Bajada u sħabu li dejjem għamlu minn kollox biex
in-Nursery tal-Ħamrun tkompli tikber għal dik li hi illum.
L-istaff tekniku li mexxa t-taħriġ tan-Nursery, matul dawn
l-għoxrin sena dejjem kien ta' l-aqwa livell fejn għen mhux
ftit għas-suċċessi miksuba.
Wara li fil-bidu tagħha n-Nursery kienet tlaqqa' t-tfal
fiċ-Ċentru li kien fi Triq Mile End, tlett snin ilu imxiet
għal post li qed topera minnu sal-llum il-ġurnata, fi Triq
Alexander, Ċentru li bix-xieraq hu msemmi 'Ċentru Tony
Bajada'. Dan iċ-Ċentru fil-futur qarib se jiġi rinnovat u
mkabbar biex ikun jista’ jilqa' iktar żagħżagħ Ħamruniżi li
kull ma jmur qed jiżdiedu.
Xi ħaġa oħra li qed iżżid fil-popolarita tagħha fin-Nursery
tal-Ħamrun hija n-numru ta' bniet u tfajliet li qed
jingħaqdu membri bil-ħsieb li jerġa' jiġi ffurmat it-team
tal-Ħamrun tan-nisa.
L-istorja tibqa' hemm, iżda kif jgħidu kollox jinbidel
maż-żminijiet. Issa, nistgħu ngħidu, li minn dan l-istaġun,
it-tfal u l-players kollha rreġistrati man-Nursery
tal-Ħamrun se jkollhom għax ikunu kburin bil-kuluri li
jħaddnu, peress li minnbarra l-Pitch 5-a-side Sintetiku se
jkollhom l-opportunita li jittrenjaw fuq il-Pitch Sintetiku
ġdid tal-Victor Tedesco Stadium. |
