It-team tal-football tal-Ħamrun Spartans twaqqaf fl-1907, mitt sena ilu. Dan il-club glorjuż huwa rinomat sew għas-supporters numerużi u brijużi li għandu. Il-kuluri ta dan it-team huma l-aħmar u l-iswed waqt li l-laqmijiet sinonimi ma’ dan il-club u supporters tiegħu huma ta’ ‘Werwer’ u ‘Tas-Sikkina.

Sa mill-bidu li ġew imwaqqfa, it-team tal-Ħamrun Spartans stabbilixxew ruħhom sew fil-kampjonat Malti, tant li fl-1913-1914 saru għall-ewwel darba champions tal-kampjonat Malti meta kellhom goal average aħjar mit-team tas-St. Georges. It-tieni kampjonat rebħuh erba’ snin wara, meta rebħu l-play off għal darba oħra kontra St. Georges. L-aqwa player f'dawk iż-żminijiet għall-ispartans kien Gejtu Psaila imlaqqam il-ħaċċa. Fiż-żminijiet ta’ wara dawk ta’ l-għoxrinijat u t-tletinijat, kienu żminijiet ftit diffiċli għal dan it-team fejn bosta players tajbin telqu u sieħbu ma’ clubs oħra.

Aktar >>

Dan l-istaġun, il-Ħamrun Spartans FC Youth Nursery dieħla fil-21 sena mit-twaqqif tagħha. Kien il-mibki Tony Bajada, li, flimkien u bl-għajnuna ta' Noel Attard u Charles Xuereb, f'Diċembru ta' l-1987 ġietu l-idea li jifforma Nursery tal-football fil-Ħamrun, bil-ħsieb li jipprepara u jtella' players għat-Team tal-Kbar li f'dik l-epoka kien għaddej fl-aqwa tiegħu. Aktar>>

Il-Ħamrun Table Football Club ilu mwaqqaf mill-1985 u llum għandu ‘l fuq minn 40 membru attiv ta’ etajiet differenti. Il-għan tal-club huwa li jippromwovi l-logħba tat-table football (magħrufa wkoll bħala ‘subbuteo’) billi jorganizza kompetizzjonijiet interni bejn il-membri kif ukoll billi jipparteċipa f’kompetizzjonijiet lokali u internazzjonali kemm fuq bażi individwali kif ukoll fuq bażi ta’ timijiet. Aktar>>

Għaqda Mużikali Immakulata Kunċiżżjoni

Il-bidu ta’ din l-għaqda mużikali iddedikata lill-Immakulata Kunċizzjoni, jmur lura għal-1978, meta Toni Borg avviċina lill xi ħbieb biex iwaqqfu għaqda mużikali ġdida fil-Ħamrun. Din il-ħtieġa nħasset wara li ġiet imwaqqfa parroċċa ġdida fil-Ħamrun minħabba li l-popolazzjoni kibret sew f’dawk l-inħawi.

Il-ħolma ta’ Toni Borg saret realta fis-sena ta’ wara, għax fit-22 ta’ Awissu, 1979, nżammet l-ewwel laqgħa ta’ din l-għaqda fil-Victoria United Football Club fi Triq Barth. Maż-żmien il-post fejn jiltaqgħu inbidel bosta drabi. Mill-Victoria United Football Club marru ġo garaxx fi Triq Kanonku Bonnċi, wara hawn sabu mkien ieħor fi Triq Ġuże’ Pace u anki fi Triq Villambrosa sakemm inxtara post ċentrali fi Triq il-Kappillan Mifsud. Fl-1 ta’ Awissu 2002 l-għaqda reġgħet imxiet din id-darba għal-post aktar ċentrali fi Pjazza Kappillan Muscat, post ferm akbar min dak ta’ qablu. Dan il-każin infetaħ uffiċjalment fid-29 ta’ Awissu 2004 mill-President Emeritus tar-Repubblika l-Professur Guido de Marco.
 Aktar>>

Għaqda tal-Mużika San Gejtanu Ħamrun

Il-Għaqda tal-Mużika San Gejtanu taf il-bidu tagħha fis-1906, meta il-Banda Mużikali San Ġużepp kienet mistiedna biex teżegwixxi programm fil-Floriana. Xi bandisti mingħajr ma għarrfu lis-Surmast u lanqas lid-delegati tal-banda ma attendewx għall-programm. Is-Surmast irrapporta dawn il-bandisti lill-kumitat biex jitressqu quddiemu u jiġġustifikaw l-imġieba tagħhom. Il-Kumitat deherlu li l-iskuża li ġab wieħed mill-bandisti kienet raġonevoli. Għalhekk il-kumitat iddeċieda li jkeċċih mill-banda u mill-każin.

Din id-deċiżjoni qajmet reazzjoni fost xi bandisti li protestaw bil-qawwa kontra din id-deċiżjoni ħarxa. Tnejn minn dawn il-bandisti ġew ukoll imkeċċija mill-każin permezz ta’ Seduta Ġenerali . B’riżultat ta’ dan, grupp ta’ bandisti flimkien ma’ soċji sussidjarji telqu s-Soċjeta’ San Ġużepp. Ftit xhur wara nhar San Ġwann jiġifieri nhar l-24 ta’ Ġunju 1906 ġiet imwaqqfa uffiċjalment il-Għaqda tal-Mużika San Gejtanu.

 Aktar>>

Il-grupp armar, twaqqaf fl-1982 bl-iskop li jieħu ħsieb l-armar tal-festa tal-parroċċa Immakulata Kunċizzjoni. Il-grupp kien twaqqaf nhar it-28 ta’ Lulju 1982 minn Joe Pace u l-ewwel membri kienu Ivan Bugeja, Sandro Buttigieg, Silvio Cacciattolo, Pawlu Camilleri, Franco Cassar, Joseph Doublet, Noel Doublet u Mario Scerri.

Fl-ewwel snin tiegħu l-grupp kien jiltaqa’ ta’ kuljum fis-sala Dun Edgar Vella li tinsab taħt il-knisja fejn aktar tard marru f’garaxx kbir li hemm ftit metri l-bogħod mill-knisja. Il-membri matul is-sena kienu jieħdu ħsieb jirranġaw l-armar li jkun ġarrab xi ħsarat u anki jaħdmu fuq armar ġdid. Meta toqrob il-festa umbagħad jibdew bil-preparamenti biex jintramaw it-toroq kif jixraq għal festa. Dan il-grupp ħa ħsieb li jagħmel xogħolijiet oħra li minn żmien għal żmien kien ikun hemm bżonn li jsiru fil-knisja. Aktar>>

Ħamrun Liberty

Il-Ħamrun Liberty twaqqaf minn grupp ta’ żgħażagħ mill-Bini ta’ l-Isqof fil-Blata l-Bajda li kienu jitlaqqgħu minn Dun Maurice Mifsud biex jagħlimhom. Fl-1963 dawn waqqfu team tal-football bl-isem ta’ ‘Ħamrun White Rock Rangers’, li f’dik l-istess sena ħadu sehem fl-I.A.S.C. >>Read more

L-ewwel klabb ta’ din il-għaqda kien fil-Lord Plumer Bar fi Triq Irjali. Meta dan il-lokal għalaq marru fir-Radio City Bar jew kif kien magħruf bħala ta’ ‘Duminku’. F’dak iż-żmien, jiġifieri lura għaż-żmien erbgħin, minn dan il-bar ħareġ it-team famuż tal-Liberty li aktar tard saru l-Ħamrun Spartans li ħadu l-league u l-Cassar Cup fl-1947.

Aktar >>

Civic Club

Is-Civic Club, soċjeta li twaqqfet f’Jannar ta’ l-1954, tinsab fl-aktar parti ċentrali tal-Ħamrun ma’ ġenb il-knisja maestuża tal-Patrun tagħna l-Ħamruniżi San Gejtanu.

Sa mill-bidu din is-Soċjeta kellha l-għan ewlieni tagħha li tkun waħda soċjali, rikreattiva u edukattiva.

Dan il-club iservi sabiex il-Ħamruniżi jkollhom post fejn wieħed jista’ jiltaqa' għar- rikreazzjoni f’post li m’hux marbut ma xi kulur politiku jew bandistiku. Miftuħ għal kulħadd mingħajr ebda diskriminazzjoni ta’ kulur, nazzjonalita’ jew twemmin.

Dan il-post ma’ tul dawn is-snin serva bħala lok li fih kien jiltaqa’ l-Kunsill Ċiviku, wieħed minn ta’ l-ewwel li kien hawn f’Malta. Dan il-Kunsill kien speċi ta’ Kunsill Lokali li għandna illum bid-differenza li ma kienx elett mill-poplu Ħamruniż iżda kien iħaddan fih rappreżentanza mill-Għaqdiet kollha stabbiliti fil-Ħamrun. Aktar>>